Hotel and Restaurant Management

FAQs – HRM Course Part 2

Question:

Ano ang ginagawa kapag nag aaral ka ng HRM
Ang tanong na ito ay madalas nagmumula sa mga batang gustong kunin ang course na ito ngunit clueless sya sa mga pangyayari. Napaka broad naman kasi pag sinabing “Hotel and Restaurant Management.” Ano nga bang gagawin ko pag kinuha ko ang course na yan? Anong pag aaralan namen? Anong mga subjects meron? Magluluto ba kami? Pano kung di ako marunong magluto? Pagaaralan ban amen kung pano mag manage ng hotel at restaurant?

Tinanong ko din yan bago ako magenroll noon, una dahil hindi talaga ako marunong magluto at naisip kong baka bumagsak ako sa mga cooking classes. Pangalawa ay ang tanong na pagluluto lang ba at management ang pagaaralan ko sa loob ng apat na taon. Sabi naman ng nanay ko, kaya nga magaaral ka para matuto ka. So nag enroll naman ako ahehe.

Syempre bawat college o university, iba’t iba ang curriculum at mga activities na ginagawa. So ibabahagi ko na lang ang aking mga karanasan noong ako ay pumapasok pa sa aking Sintang Paaralan para naman may clue kayo in general kung ano ba ang mga ginagawa ng mga HRM students.

Sa unang taon ng course na ito, syempre puro Introductory subjects muna tulad na lang ng Intro to Hospitality. Dito ituturo sa inyo ang iba’t ibang uri ng hotels, restaurants, mga food chains at kung ano ang pagkakaiba ng mga ito sa isa’t isa ganun din ang structure ng bawat isa. Naalala ko noon na inutusan kame ng Prof namen na libutin ang Maynila at manguha ng mga Hotel Brochures (muka kaming palaboy hehe).Pero as a freshman, napakagandang exposure nitong ipinagawa samen ni Prof. Aba, noon lang ako nakakita (as in first time) ng napakagagandang mga lobby ng hotel na may mga fountain pa at halos diamond na kumikinang ang mga chandeliers. Edi nawala ang pagka Indio ko. Andyan din ang matataas na front desk counters at sa likod noon ang mga naggagandahan at nagggagwapuhang at nagtatangkarang mga receptionist. Napaisip tuloy ako kung itutuloy ko pa ba ang kursong ito kasi hindi naman ako kagandahan ha ha.

May subject din kameng Intro to Food Service Techniques kung saan itinuro sa amin ang mga basic table set up at service (oha oha). Pagandahan ng set up at paangasan sa creativity. Itinuro na din sa subject na ito ang mga klase ng table service tulad ng Russian, French, American at Family Service. Syempre may mge demo yan. Kami na nag setup ng lamesa, kami pa nagluto, kami pa nag serve ng pagkain ahehe at higit sa lahat kami pa naghugas ng pinggan at naglinis. Tinuruan din kame dito kung ano ang 7 basic napkin folds (sailboat, banana, pyramid, candle, bishop’s hat, fan at lotus na syang pinaka time consuming gawin) at naalala ko na iyon ang Final Exam namin. Kelangan maitiklop ang 7 napkins sa loob ng isang minuto (take note nagawa ko yon within 57 seconds haha). Anu ba yan nabubuhay ang aking mga alaala ha ha ha.

Isa sa mga minor subjects nyo ang P.E. at kinakailangan nyong magswimming. Guys and Gals required kayo matuto nyan lalo na sa mga nagbabalak sumakay ng barko. Don’t take this subject for granted mga kids.

Nung 2nd year naman kame ay nagkaroon na kami ng baking classes. At ang final exam namin ay magbake ng cake. By twos ang grouping at kami ng partner ko ay parehas walang alam. Pero matagumpay naman naming napatayo ang Pineapple Upside Down Cake (para paraan lang yan). Hindi madali mag bake. Lalo na kung walang tamang equipment. Manual kaming naghahalo ng harina at itlog noon at bawal magpalit ng ikot ng halo kung hindi pangit ang kakalabasan ng cake base. Kaya nga lumaki ang braso naming kakahalo. Ang pinaka enjoy na part nito ay natuto akong gumawa ng flower dun sa cake. Hindi din pala basta basta yun. Pinagawa kame ng 200 flowers of different sizes and colors ang saya saya.

Nagkaroon din kami ng subject na housekeeping kung saan syempre kailangan naming matutong magwalis at mag mop. Hehe pero hindi lang yan. Natutunan namin kung ano ano ang mga patong patong na telang inilalagay sa ibabaw ng kama. Kaya pala mukang malaki ang mga hotel beds dahil sa mga kobre kama hihihihi.Hindi pala ganun kadali ang trabaho ng mga room attendants lalo na pag malaki yung kama. Bukod pa dyan natutunan namen gumawa ng mga flower arrangements sa subject na ito na kung saan ay nagpaangasan na naman pagdating sa creativity.

Nasa 3rd year naman ako nung International Cuisine na ang pinag aralan namen. Syempre, bawat isa magrereport ng cuisine ng iba’t ibang bansa. At ang na-assign saken ay Germany. Alam ko lang ay dun sa kanila nanggaling ang Octoberfest at mahilig sila sa mga sausages at Sauerkraut.
3rd year na din kami nung may Beverage Management subject na kami. Paborito ko yang subject na yan hindi dahil inuman sa loob ng klase, tinitikman lang naman namin yung alcohol. Kaya ko yan paborito kasi dyan ako natuto mag flairing. Hindi ako masyadog magaling pero gustong gusto ko yan. Kahit nagkakanda bukol bukol ang noo ko at pasa pasa ang braso ko tuwing babagsak saken yung bote ng emperador ay ayus lang. Nakakatuwa pag nakakabuo ako ng routine at kapag hindi na bumabagsak yung bote. Sumali nga ako sa isang bartending competition (hay nagmaganda) talo nga lang pero it was a great experience at achievement na yun para saken nung time na yun.

Syempre hindi matatapos ang pagaaral natin kung hindi magkakaroon ng thesis at practicum. Hindi ko na ieexplain ang thesis kasi alam kong alam nyo kung ano ang ibaig sabihin ng salitang – madugo. Sa practicum naman twice ako nag OJT. Restaurant practicum nung 2nd year ako at Hotel practicum nung 4th year ako. Hmmmm, marami din akong kwento tungkol sa practicum na yan pero saka ko na lang ibabahagi kapag merong nagtanong dahil isang malaking topic na naman yan at hindi na yan kasali sa question of the day.

Ayan mahaba haba din ang naikwento ni Lola Basyang ngayon tungkol sa kanyang buhay kolehiyo at sana ay makatulong ito sa mga nangangalap pa ng impormasyon. Marami pa akong hindi naisali dyan pero impormasyon lang ang gusto kong ibigay sa inyo mga bata at hindi ang aking talambuhay kaya taympfers muna.

Hanggang sa susunod!

Ciao!

___

Mga babasahing may kinalaman dito:

https://aysabaw.wordpress.com/2012/09/23/hotel-and-restaurant-management-course/

https://aysabaw.wordpress.com/2012/08/22/nag-aral-ba-tayo-para-maging-waitress-lang/

https://aysabaw.wordpress.com/2013/03/05/faqs-hrm-course-part-1/

http://hotelierako.wordpress.com/2013/08/22/a-day-in-a-life-of-a-business-center-team-leader/

http://hotelierako.wordpress.com/2013/08/23/a-day-in-a-life-of-a-demi-chef-de-partie/

http://hotelierako.wordpress.com/2013/08/25/a-day-in-a-life-of-an-assistant-restaurant-manager/

____
Maraming salamat po sa mga bumabasa ng isinulat ko patungkol sa mga kalimitang itinatanong tungkol sa HRM Course at para po sa mas marami pang impormasyon, pakidalaw po ang blog ko na naglalaman lamang ng mga post patungkol sa hospitality http://hotelierako.wordpress.com/. Salamat po ulit 🙂

FAQs – HRM Course Part 1

Sa tuwing sinisilip ko ang stats ng blog ko, napapansin kong marami rami ang tumitingin sa isinulat ko tungkol sa HRM course. At kapag tinitingnan ko ang mga terms na ginamit nila para mahanap ang blog ko ay natutuwa ako sa iba’t ibang mga tanong na nilalagay nila patungkol sa kursong ito. Siguro maraming mga kabataan ang nagnanais na kumuha nito o kaya ay maraming nalilito at kumukuha pa ng impormasyon patungkol dito. Marami din namang mga katanungan na tila out of this world at natatawa talaga ako habang binabasa ko.

O sya, nagmamagaling na naman ako at mangangahas akong sagutin ang ilang mga katanungang nabasa ko.

Question # 1

Magkano ang baon mo pag HRM ka

Guys and gals, depende po yan sa inyo. Ang baon ko noong kapanahunan ko ay 100 pesos a day kasi 50 pesos and pamasahe ko balikan mula samen hanggang sa school at 50 pesos ang breakfast, lunch and dinner budget ko pati pala meryenda. At nung nagtaas ang pamasahe eh 120 pesos na ang baon ko hanggang makagraduate ako.  Kung ang tinatanong nyo naman ay kung magkano ang magagastos nyo sa mga practical exams or trainings eh naku, I’ll be frank. Magastos po ang kursong HRM, kung iyan ang gusto nyo talagang malaman. Marami rami kayong gagastusan, halimbawa na lang kapag may baking or culinary subject kayo. Syempre kayo ang bibili ng mga ingredients. Kapag may beverage subject naman kayo, syempre bibili din kayo ng mga liquors at mixers. Kapag naman may mga functions or events at kelangan nyo mag arrange ng mga flowers at centerpiece eh kelangan nyong gumising ng maaga at magpunta sa Dangwa…ahehe. May mga ibang curriculum na may Intro to Tourism subject kayo at kelangan nyo syempre mag-tour kaya gagastos na naman kayo.

Uulitin ko, magastos ang kursong ito. Pero kung ito talaga ang passion mo, ito ang kunin mo. Makikita mo naman kasi ang resulta ng mga pinaghirapan mo kapag naka graduate ka na at nakahanap ng magandang trabaho.

Question # 2

Marami bang Math subject ang HRM

Maraming estudyante ang nagsasabi na mahina daw sila sa Math kaya HRM ang kukunin nilang course. Aaminin kong napakahina ko sa Math at kahit fraction at decimal ay iniiyakan ko pa (huhuhuhu) pero hindi naman ito ang dahilan kung bakit HRM ang kinuha kong course, slight lang ahehe. Guys and gals, bigyang dangal nyo naman yung kurso. Baguhin naman natin ang image ng kursong ito kasi minamata mata ng iba at sinasabing ang HRM ay tapunan lang ng mga hindi nakaabot sa kota ng Engineering or Accounting o kaya tapunan ng mga walang ibang course na maisip at kung ano ano pa. Hindi naman talaga sa ganon. Exciting ang course na ito, kasi walang masyadong Math (hahaha) at hindi kelangan mag compute (isa pang ha ha ha). Uulitin ko, hindi boring ang kursong ito (isa pa ulit ha ha ha).
Meron din pong Basic Math subjects sa HRM tulad ng Accounting, Algebra (yata) at Statistics (ganyan yung nasa curriculum ko noon, di ko lang sure ngayon). Pero as I said, hindi nyo kelangan ng scientific calculator at mahahabang ruler dito. Ang kelangan nyo – spatula, chopping board, shaker at flairbottle saka magandang background music (ahehe).
Para sa mga katulad kong hindi Math Wizard, pag isipan nyo munang maigi. Wag nyong kunin ang kursong ito nang dahil lang mahina kayo sa Math. Kung wala kayong passion para sa Hospitality ay wag nyo na lang ituloy. Lilinawin ko ha, ang Hotel and Restaurant Management ay hindi po para sa mga mahihina sa Math, para ito sa mga may kakayanan na humarap at makipag usap sa tao (in short makakapaal ang face…ahehe biro lang), sa mga taong presentable at kaaya-aya( in short model-modelan ahehe), sa mga taong smart at masayahin in nature.

Ayan, hanggang dito na lang po muna tayo at sana ay nasagot ko ang mga FAQs ng kursong HRM. Marami pa akong nabasang iba’t ibang katanungan kaya may kasunod pa itong question and answer portion ko.

Hanggang sa muli!
Ciao!

—
Mga babasahing may kinalaman dito:

https://aysabaw.wordpress.com/2012/09/23/hotel-and-restaurant-management-course/
https://aysabaw.wordpress.com/2012/08/22/nag-aral-ba-tayo-para-maging-waitress-lang/
http://hotelierako.wordpress.com/2013/08/23/a-day-in-a-life-of-a-demi-chef-de-partie/
http://hotelierako.wordpress.com/2013/08/22/a-day-in-a-life-of-a-business-center-team-leader/
http://hotelierako.wordpress.com/2013/08/25/a-day-in-a-life-of-an-assistant-restaurant-manager/

Hotel and Restaurant Management Course

Napansin ko lang na madami pa din ang nagtatanong ng kung ano ba talaga magiging trabaho nang isang nagtapos ang kursong HRM (Hotel and Restaurant Management). Gaya ng nasabi ko sa nakaraan kong blog na Nag aaral ba tayo para maging Waitress lang (babala: isa itong napakahabang blog patungkol sa aking mga naging karanasan sa trabaho), hindi ka lang serbidora pag natapos mo ang kursong ito dahil malawak ang nasasaklaw ng industriyang inyong pinapasok.

Ang mga sumusunod ay iilan lang sa mga propesyon o sangay ng Hospitality Industry na maari nyong pagpilian o mapasukan pag kayo ay nakapagtapos na:

1. Chef

Sa apat na taon ng pag aaral nyo ng kursong ito, may ilang subjects na pumapatungkol sa pagluluto ang pagdadaanan nyo, at dito nyo malalaman kung hahanay ba kayo sa mga magiging magaling na Chef tulad ni Heny Sison at Nora Daza na mga batikan sa larangan ng pagluluto (syempre pinili kong pangalan eh yung sikat :)).Sa aking pagkakatanda, mayroon akong Culinary, Baking at International Cuisine na subjects noong ako ay nasa kolehiyo. Malamang sa ngayon, nadagdagan din iyan depende sa bagong kurikulum o depende sa unibersidad na iyong papasukan. (Para sa isa pang babasahin tungkol sa buhay ng isang Chef tingnan ito http://hotelierako.wordpress.com/2013/08/23/a-day-in-a-life-of-a-demi-chef-de-partie/)

Tandaan lang natin na, hindi naman agad agad tayong makakapasok ng Chef de Cuisine of Sous Chef pagkatapos natin mag aral. Magsisimula muna tayo bilang taga balat ng patatas at sibuyas at kailangan natin ng matinding tyaga at determinasyon para maabot natin ang ating minimithi. At kung sa palagay mo ay hindi ka masyadong nahihilig sa pagluluto, may iba pang maaring pagpiliang propesyon tulad ng:

2. F&B Service Staff

Dito naman lumilinya ang mga waiter/waitress, bartender, hostess/receptionist sa mga restaurants, stand alone man o nasa loob ng hotel. Ang mga eksperiyensadong service staff ay unti unting napopromote sa paglipas ng panahon depende sa galing at determinasyon sa trabaho. Sa una ay maaring maiangat ka bilang Captain o Senior Waiter, sunod na ang Assistant Restaurant Manager, Restaurant Manager at kung sa malalaking hotel ay meron tayong tinatawag na Assistant F&B director/Manager at sumunod pa ay ang Food and Beverage Director.

Sa linyang ito, kailangan ng pasyon sa iyong ginagawa. Kinakailangan dito ang kaalaman sa pagkain at lalo na sa mga alak at mga cocktails. Syempre, kailangan din ng matinding ngiti at service skills ika nga. Halimbawa na lang ay ang sikat na sikat na TGI Fridays. Sa aking pagkakatanda, bago ka maging bartender ay kailangan mong sauluhin ang mahigit tatlong daang klase ng international cocktails at dapat din ay marunong ka mag flairtending. Silipin natin kung ano ang ginagawa ng mga bartender sa shift nila sa post na ito – A Day in a Life of a Bartender.

3. Front Office

Kung ayaw nyo naman sa linya ng F&B, maari naman kayo sa Front Office. Dito maari kayong magsimula bilang telephone operator, concierge, bell boy, o receptionist. Dito naman, kailangan ng kakayahan sa pagharap sa matinding pressure. Anong gagawin mo kung may kaharap kang guest na nais mag check in at bukod pa dyan ay kabilaan ang pagriring ng telepono mo, sabay hindi gumagana ang sistema nyo at ilang segundo na lang ay matatapos na ang shift mo? (Para don sa may mga tanong tungkol sa trabaho ng bellman at conceirge pa-click na lang din dito http://hotelierako.wordpress.com/2013/06/19/faqs-ano-ang-pagkakaiba-ng-bellman-sa-concierge/) (Para sa babasahing patungkol sa buhay ng isang Business Center Team Leader sa Front Office basahin ito http://hotelierako.wordpress.com/2013/08/22/a-day-in-a-life-of-a-business-center-team-leader/)

4. Sales and Marketing

Dito naman napapasok ang mga taong may magaling na convincing skills. Ang sales at marketing ay dalawang magkaibang sangay na pinag isa dahil iisa lang naman ang layunin ng mga ito. Ang mapukaw ang puso ng mga mamimili para tangkilikin ang inyong produkto. Ang mga napupunta sa linya ng Sales ay yung may mga “negotiating and convincing” skills at ang nasa Marketing naman ay yung may mga “creative and artistic minds” na makakapag isip ng medium na magagamit para mga adverts na tinatawag.

5. Cruise Ship

Kapag binanggit ang “Cruise Ship” madalas ang pandinig dyan DOLYAR. ^__^

Totoo naman yan. Mabilis kumita dyan, pero mahirap din ang trabaho at wala pa kayong day off. Isa pa ay ilang linggo o buwan kayong nasa gitna lang ng tubig. Pero sanayan lang din yan. Isa pa, makakpunta ka sa iba’t ibang parte ng mundo lulan ng barko. Yun nga lang sabi ng iba malaki nga ang kita, pero mabagal naman ang career advancement.

Ok peeps…eto na ang pinaka aabangan siguro ng lahat bilang ito ang madalas gustong maging trabaho ng mga HRM grads, ang makapagbarko. Sa mga gustong basahin eto na po A Day in A Life of a Cruise Ship Stewardess

6. Airlines (Cabin Crew)/ Travel Agent

Maari din kayong makapasok sa airlines bilang Cabin Crew kung kayo ay slim and slender at kung kayo ay matangkad, pero syempre dapat alam nyo rin na marami kayong makakalabang Tourism graduates na mas lamang sa inyo sa kaalaman patungkol sa Travel & Tourism.

7. Events

Kung magaling ka mag organize at mag plano ng mga events tulad ng meetings, conferences, parties at kung ano ano pang functions, pasok ka dito.

Note #1: Ang Hospitality Industry ay parang Film Industry. Pag tungtong mo sa entablado, dapat ay nakangiti ka na. Sa industriyang ito, tayo ang nagpapasaya sa mga tao at binabayaran nila tayo para maghatid nito. Kaya kung ikaw ay may “grumpy attitude” o kung hindi ka smiling face ay hindi ka pwede dito dahil kahit kakabreak nyo lang ng kasintahan mo, pagharap mo sa ibang tao ay kelangan abot tenga ang ngiti mo.

Note #2: Tulad din ng Film Industry, nakakapagod ang industruyang ito. Mas madalas ay dose oras kang nakatayo (na naka high heels – para sa babae). Swerte ka pag nagbabayad ng overtime ang kumpanyang napasukan mo. Maipapayo ko lang, na dapat tanggapin mo na sa sarili mo ngayon pa lang na ang industriyang iyong pinapasok ay hindi tulad ng iba na eksaktong 8 o 9 hours lang ang trabaho. Mas madalas 10 – 12 hours at hindi ka din makakaranas ng ” holiday.” At pagtapos ng lahat ng ito, kahit ngarag ka na sa loob ng dose oras mong nakatayo ka, ilang linggo ka ng walang off at nalilipasan ka na ng gutom ay kelangan kaaya aya pa din ang iyong itsura. (Oo, talent yan. Mga Hoteliers at HRM Studes and grads lang makakagawa nyan :))

Note #3: Kung may nakikita kayong ilang taon na ay waiter/waitress pa din, o kaya ay bellman pa din at hindi pa din sila napopromote o nalilipat ng trabaho hindi ito dahil sa wala silang kakayahan. Minsan choice nila ito. Bakit kamo? Ipapaliwanag yan sa inyo ng dollar sign. 🙂

Iilan lang yan sa mga maaring maging trabaho at maaring nyong pasukan sa Hospitality Industry, at habang nag kakaroon kayo ng mga experience at exposure ay lalawak pa ang inyong pag unawa at kaalaman patungkol sa industriyang ito. Habang nag aaral ka pa, dapat alamin mo na kung ano ang iyong forte para yun na ang hinangin mong “skills” at doon ka na mag focus.

Sana ay nakatulong ako. Ang lahat ng aking mga inilahad ay base lamang sa mga karanasan ko at ng mga taong katulad ko din na nasa Hospitality Industry.

Kung meron man kayong iba pang katanungan , mag iwan lang ng komento at sisikapin nating sagutin. O kaya, tweet me ^__^

Ciao! 🙂

Nag-aral ba tayo para maging waitress lang?

Taong 2006 nung ako ay nakatungtong sa entabladong minimithing matapakan ng bawat estudyanteng nagnanais ng magandang kinabukasan. Simula na ito ng panibagong lakbayin ng buhay. At para sa napakaraming tulad ko na kakatapos lamang ng kolehiyo noong panahong iyon, kanya kanyang sikap naman na makahanap ng disenteng trabaho.

Naalala ko ang mga panahong wala kaming magawa sa klase habang wala pang propesor, tinanong ako ng kaklase ko na itago natin sa pangalang “D” ng ganito – ” Nag aaral ba tayo para maging waitress lang pag katapos?” Ako nga ay napaisip dahil sa sinabi ni D. Andaming tanong na sumagi sa isip ko noon at naisip ko ang lahat ng hirap ko kung mauuwi lang ako sa pagiging waitress. Bachelor in Hotel and Restaurant Management ang kursong aking kinuha sa aking Sintang Paaralan. At naisip ko nga na, bakit nga ba ako kumuha ng gantong kurso? Ano ba ang unang trabahong makukuha ko pag natapos ko ito? Bakit ko kelangang mag aral ng apat na taon para maging waitress lang pagkatapos? Samantalang yung ibang hindi naman din nakatapos ay nakakakuha din ng ganong trabaho?

Balikan natin ang panahon na kung saan ay ako ay nasa 4th year high school pa lamang at nag hahanap ng Unibersidad na mapapasukan at nag iisip kung anong kurso ang kukunin. Sa iisang unibersidad lang ako kumuha ng entrance exam. Iyon ay dahil doon ko lang gustong pumasok dahil sa baba ng tuition fee dahil kapos kami noong mga panahong iyon. Isa pa ay 150 pesos lang ang binayaran ko para makapag exam, oh mas mababa pa ata. Nalula ako sa presyo ng entrance exam fees sa ibang sikat na unibersidad, kaya hindi na lang din ako sumubok.

Sa pag puno ng application form, kelangan isulat ang unang tatlong kursong nais ng applicant kaya kelangan mag isip.

Unang una kong nilagay ang HRM (Hotel and Restaurant Management), sunod ang Business Management at huli naman ang MassComm. Kung maapansin nyo, lahat ng pinili ko ay yung halos walang Math sa curriculum, o kung meron man ay basic lang. Naisip ko noon na gagayahin ko ang tiyuhin ko kaya kukuha ako ng HRM. Sa isang cruise ship kasi sya nagtatrabaho at nakita ko kung gaano karangya ang pamumuhay na naibigay nya sa dalawa nyang anak. Hindi sya nakapagtapos ng kolehiyo pero mas malaki pa ang kinikita nya kesa sa mga ibang degree holder na kasing edad nya. At kung tutuusin, waiter lang sya, pero napakaganda ng buhay nila. Kaya lalong nabuo ang desisyon ko na kunin ang kursong iyon. Pursigido akong magtrabaho din sa cruise ship pagtapos kong mag-aral.

Habang ako ay nag aaral, natutunan ko na malawak pala ang saklaw ng industriyang aking nais pasukin. Maari kang magtrabaho sa hotel, restorant, bar, fast food, events company, catering at pwede ka pa palang luminya sa airlines. Maari ka ding magturo kung iyong nanaiisin. Pero habang malapit na ako sa pagtatapos, at nang ako ay nakaranas na ng mga practical trainings sa hotel at restaurant, naisip kong hindi ko alam kung saan ako pwede. At lagi akong bumabagsak sa sagot na “mag aapply akong waitress pag na tapos ako. Dun muna ako magsisimula.” Nauumpisahan na din akong tanungin ng mga kaibigan ng aking ina, na saan ko nga daw balak mag apply ng trabaho pagkagraduate ko at anong trabaho ang gusto ko. Sinasabi ko palagi na mag aaply ako agad sa barko kahit hindi ko naman alam kung paano at kung makakapagbarko nga ba talaga ako. Alam kong pag sinabi kong magiging waitress ako pagka graduate ko, baka naman matawa sila at sabihing “nag-aral ka pa?” Kasi naman, tulad ng mga anak nila na magiging inhinyero, accountant o nars pagkagraduate, eh hindi ko talaga sasabihin na magiging waitress ako. Hindi naman nila maiinitindihan pag sinabi ko kung bakit ganun ang gusto ko. Sinasabi ko na lang sa aking ina noon na, “hayaan mo na, pag nakapagbarko na ako, lalampasuhin ko ang sweldo ng lahat ng mga inhinyero at accountant na yan, kahit gaano pa sila kagaling sa math.” (Yun ang fighting spirit!)

Nagkaroon kami ng pag uusap ni D at pag uunawa sa naitanong nya. Sabi nya ” Bakit parang lahat ng trabahong pwede natin applyan pagka graduate eh puro pagsisilbi naman sa ibang tao? Pag sa restorant tayo ano ba ang aapplyan naten? Waitress? Bartender? Chef? eh hindi naman din tayo magaling magluto (palagi lang kaming taga pamalengke at tagahugas ng pinggan tuwing may cooking class kami noon.) Kapag sa hotel naman, anu tayo? Chambermaid? Receptionist? Eh wala ba tayong mapapasukang trabaho na tayo ang pagsisilbihan? O kaya hindi ba tayo pwede pumasok sa opisina? ” May punto nga sya don. Para nga kaming nag aral maging mga serbidora. Sinabi ko na lang sa kanya na, ” Wala namang tao na pag ka graduate eh boss ka na agad, maliban na lang kung nag aral ka sa napakagandang unibersidad, o kung galing ka sa mayamang pamilya na nag aral ka lang para makakuha ng diploma at pag tapos eh ikaw na hahawak sa family business o company nyo.” Napakibit balikat nalang kami pareho dahil huli na ang lahat para magbago pa kami ng kurso at wala na rin naman kaming magagawa.

Hindi pa man kami nakakaakyat sa entablado, excited na kami maghanap ng trabaho. Mayo pa ang graduation pero Marso pa lang ay nag aaply na kami. Hindi pala ganun kadali. Tinawagan ako para interbyuhin sa isang kaswal na restaurant sa isa sa mga malls na nasa area na pang mayaman at hindi ako nakapasa sa interbyu. Sabi ko ok lang. Isang beses pa lang naman yan. Tinawagan ulet ako para interbyuhin sa pinakasikat na kapehan sa bansa. Sobrang excited ko. Kasi bihirang bihira ang nakakapasa doon ayon sa aking mga kaklase, at ilang beses na silang nag apply don pero ni hindi sila natawagan. Pag punta ko sa opisina nila, group interbyu pala. Nanlata ako. Lahat ng kasabay ko ay mga galing sa mga sikat na unibersidad. Yumuko ako at tiningnan ang suot kong damit. Pinagmasdan ko sila at pinakinggan ang kanilang pinag uusapan. Biglang nawala lahat ng “self-confidence” na baon ko. Tahimik lang ako habang inaantay namin ang mag-iinterbyu samen. Dumating sya at naging masaya naman ang group interbyu na iyon. Nung matapos ang interbyu na yon, naisip ko na sila man na nag aral sa mga mamahaling unibersidad eh kasabay ko ding nag aapply para maging barista. Kaya nabuhay ang aking loob. Natuwa din ako at makalipas ang ilang araw ay tinawagan ako para sabihing nakapasa ako at mag aantay na lang ng bagong pwesto na bubuksan ang kapehang iyon na kung saan ako ay madedestino.

Sa pag aantay ko ay nakasubok din akong mag apply sa ibang mga kumpanya. My kaklase akong nagsabi na, mag apply ako sa isang ahensya na nag papadala ng mga Pilipino sa ibang bansa. Walang anu ano ay nag apply din ako, at nakapasa sa interbyu. At binigyan ng kontrata para maging waitress at ilang buwan pa ay nakalipad na ako patungo sa bansang sinasabi nilang “land of milk and honey” ika nga.

Ito ang una kong trabaho. Narating ko ang napakalayong disyerto na mag-isa, walang kakilala kundi ang mga kapwa ko empleyado, malayo sa kamag anak at lahat ng mga kaibigan. Nahirapan ako sa umpisa at nakita ko ang iba’t ibang sitwasyon ng ating mga kababayan sa lugar na iyon. Sinabi ko sa sarili ko, hindi ako mananatiling waitress at ipinapangako kong hindi ako lalampas ng edad na tatlumpu na nagsisilbi pa rin. Nais kong magbunga ang lahat ng aking pinaghirapan noong ako ay nag aaral pa lamang. Nais kong patunayan na ang kursong kinuha ko ay hindi lamang para sa mga taong walang karunungan sa math. Nais kong patunayan higit sa lahat na ang pagiging waitress ay hindi basta basta. Hindi lahat ng tao ay kayang ngumiti kahit sobrang dami ng hinanakit mo sa buhay. Hindi lahat kayang manilbihan at makisama sa iba’t ibang uri ng tao. At higit sa lahat hindi lahat may karakter na kaaya aya para luminya sa propesyong ito.

Hindi nga ako nag aral para maging waitress lang. At hindi dapat nila-lang ang trabahong iyon. Isa iyong propesyon na ginagamitan ng abilidad at kaaya ayang karakter.

Hindi ako nag aral para maging waitress lang. Bagaman doon ako nag simula, umusad ang aking karera at umangat.

Hindi na ako isang waitress. Pero ikinararangal ko ang trabahong naging susi para mabuksan ang aking isip sa industriyang ito, nakapagturo sa akin ng napakaraming bagay at naging daan para marating ko ang lugar na kinalalagyan ko.

🙂