aysabaw.com

Siguro ay nabalitaan niyo ang trahedya ng mga Honeymooners na namayapa habang nandito sila sa Maldives (sumalangit nawa, at nakikiramay ako at nalulungkot sa kanilang sinapit) at siguro ay nag-aantay kayo ng post ko tungkol dito (yaaak, feeling sikat?) kaya ito na at magpopost ako. 

Pero ang post na ito ay hindi tungkol sa isyu nung mga namayapa at hindi ko bubungkalin ang istorya dahil hindi talaga namin alam ang tunay na nangyari. Walang statement na nilabas yung hotel kung ano talaga ang nangyari. So ang post ko ay tungkol sa mga kahindik hindik na comment ng mga mamamayan ng social media HA HA! Alam niyo namang patola ako minsan kaya heto papatulan ko ang mga comments na nabasa ko kagabi na hindi ko alam kung matatawa ako o maiinis sa mga kakaibang teoriya nila tungkol sa Maldives.

Heto ang mga comments nila at hindi ko na ibublur ang mga pangalan nila bahala sila.

WAHAHAHA. People of the Philippines. Hindi ko kinaya yung comment na may nangunguha diyan at binuhusan dapat ng asin.

Kung may nangunguha talaga diyan, sana sa mahigit isang taon kong paglangoy ay nawala na ako. I mean, mas malaki ang chance na makuha ako dahil kumpara sa iba mas madaming beses akong nasa tubig. Ganun din kung may sinkhole edi sana matagal na akong nahigop. Yung mga dive instructors din namin na 20 years ng nagtatrabaho bilang dive instructor ay buhay pa din.

At parang wala pa naman akong nababalitaang namatay dito ng dahil sa kuryente. Kakaiba ang mga teoriya.

Anyway, sa totoo lang, hindi lang naman sa Maldives may namatay dahil sa pagkalunod. Kahit saan naman.

Unang unang tinuro sa akin ng dive instructor ko ay wag sisisid sa lugar na hindi ko alam. Mahalaga na kumuha ng ‘local guide’ na nakakaalam ng environment. Kaya kahit gaano kababaw ang tubig o gaano kalinaw, kung perstaym ko ay hindi ako lumalangoy o sumisisid unless may kasama akong guide.

Sa tubig, hindi ka dapat masyadong confidently beautiful with a heart. Kahit gaano ka kagaling lumangoy, huwag kang kampante. Magsuot ng life jacket lalo na kung malakas ang alon.

Nung dinalaw ako minsan dito ni non-IG-husband at nagsnorkelling kami, ayaw niya mag life jacket kasi nakita niya yung mga bata na tumatalong sa bangka na walang life jacket. Ako din walang life jacket. Nakigaya siya dahil daw lulutang naman siya. Lumulutang naman talaga sa tubig alat. Malakas yung alon. Ilang minuto lang, pinulikat na siya.

Mula noon, hindi ko na siya pinapalangoy pa ng walang life jacket.

Isa pa, ang rule pag nasa tubig, walang magkakapitan kapag nalulunod o pinupulikat. Magrelax lang at magisip ng solusyon.

Gaya ng sinabi ko, magpasama muna sa local o sa nakakaalam ng environment bago lumangoy. Hindi ako lumalangoy hangga’t hindi ko kabisado ang lalabasan at papasukan ko. Iba’t iba ang hugis ng isla at formation ng house reef ganun din ang current.

Yung litrato sa taas ang isla kung saan ako nakabase ngayon. Makikita niyo ang parte kung saan malalim. Iba iba din ang direksyon ng current depende kung nasaang parte ka na ng housereef. Siyempre kung hindi ka marunong lumangoy at hindi ka komportable sa tubig, wag maglakas ng loob.

Pinakaimportante sa paglangoy at pagsnorkeling ay komportable ka na sa tubig. Yung bang hindi ka na takot makita na puro blue lang ang nasa paligid mo at hindi mo makita ang buhangin sa lalim. At lalong hindi ka na takot makakita ng mga marine creatures.

Itong litrato naman sa ibaba yung isla kung saan ako dati nakabase. Ibang iba iyang kesa sa isla kung nasaan ako ngayon.  At kung makikita niyo yung mga arrow sa bandang kanan, may magkaibang direksyon ang current kaya kung hindi ka matibay sa languyan at hindi mo alam na may ganoong pangyayari sa parteng iyan ng tubig ay wag kang lulusong.

Ang masasabi ko na lang ay tao tayo at hindi isda. Hindi natin elemento ang tubig. Kaya’t ibayong pag-iingat saan man kayo magpunta.