aysabaw.com

Nakakapagod na ang paulit-ulit

Na paggising sa umaga

At pagpasok sa opisina

Para magpayaman ng iba

 

Nakakapagod na ang paulit-ulit na pagsusumamo

At paulit-ulit na pagsunod

Sa patakarang lagi lamang  para sa kanila

At hindi para sa iyo

 

Nakakapagod na ang paulit-ulit

Na pagkaubos ng oras

At mga sandali

Na lagi ay para sa kanila

At hindi para sa iyo

 

Nakakapagod na ang paulit-ulit

Na pagkatuyo ng iyong utak

Para sa kapakanan nila

Nilang marami nang pera.

 

Nakakapagod na ang paulit-ulit

Na iyong pagsasakripisyo

Para sa pagyaman nila

At sa kakarampot mong sweldo

 

Nakakapagod na ang paulit-ulit

Na hindi pantay na pagikot

Ng mundo

Kung saan ang may pera ang laging nasa itaas

At ang mahihirap ay lalo pag dinadayukdok

 

Nakakapagod na ang paulit-ulit

Na pagpaplantsa ng gusot ng iba

Ang pagpasan ng bigat na dahilan

Ng patuloy na paglubog ng iyong mga paang

Unti-unting nababalaho

Sa malalim na putikan na pagdaka’y

Unti-unting nagiging kumunoy

 

 

Nakakapagod na ang gumising

Para sa kanila

At hindi para sa iyo

Nakakapagod na.

 

*mula sa taong tinatamad na magtrabaho at magpayaman ng dati nang mayayaman  at nais na lang magtanim ng kamote at kamatis sa kanilang bakuran at mamitas ng aratiles at bayabas mula sa bakuran ng mga nagtsitsismisang  kapitbahay 

 

***featured image: www.untvweb.com